الدمعه الي تكابر .. في طرف عيني
يردها الموق بس الجفن حدرها
سمعت صوتك مع العالم .. يناديني
وازريت لا ردها بالعين واسترها
وصديت ماودي ان الناس .. توحيني
مثلي يموت ودموعه .. صعب ينثرها
ويخنقني البوح .. بس القلب يعصيني
ويبقا بوسط الصدور وفي خواطرها
والحزن لوني خفيته .. واضح فيني
ورد على القلب والفرحات صدرها
والبسمه الي تبيني .. بس تخطيني
متى على الله .. يجيها يوم واظهرها
ألآحي الورق .. مدري هي تلاحيني
اون وتسجع .. ووناتي تكـررها
لبيه يا ذكرياتي .. واجمل سنينـي
ويا قصة عايشه لو مات .. آخرها
وين انت ياول غرامي .. يا معنيني
وين انت ياغلا ذنوب القلب واطهرها
اصحا وطيفك .. معا زولي يباريني
وارقد واشوفك مع احلامي تباشرها
مدري تناسا غصب اوانت .. ناسيني
ومدري عهودك وش الي صدق غيرها
واليوم وينك بهالدنيا .. وانا ويني
طالت ليال الفراق .. بعين ساهرها
كم قلت توبه .. ترا ما عاد تعنيني
ان جات لـ النفس .. نفسي يمكن اقدرها
واليا اظلم الوقت هوجاسي يسريني
ويضيق صدري وكل ايامك اذكرها
وتبيني .. انسا وانا ما عاد يمديني !
لو شفت حالي .. قسم بالله تعذرها
اصبر الحال .. في قولة بـ ياتيني
وانا ادري اني .. اببطي لو اصبرها
وقصايدي في غيابك .. ما تسليني
لو تطرب الناس تشكي جرح شاعرها
والنفس تشكي زمان صدق مشقيني
حتى انت ياغلا البشر تبعد وتحقرها
والدمعه الي من الوحده .. تواسيني
إلي من آخر لقا .. بالله خابرهـا
شفها تكابر وترجف في طرف عيني
ولاني عقب شوفتك يالزين ذاخرها
..
.
الإثنين ديسمبر 27, 2010 7:09 pm
